ليلـــة جرجب.. وماذا قال مانع بن سويط

بسم الله الرحمن الرحيم..

اخواني الاعضاء .. اقدم لكم اليوم قصه وقصيده .. وهي عن ليلة جرجب التي انتصر بها قبيلة الظفيــــر بإنتصار كاسح !

إليكم القصه والقصيده ,,,

ليلة جرجب : الظفير بقيادة شايوش بن سويط وشمر بقيادة فارس الجربا سنة 1224هـ 1809م

النـــــص بالعاميه:

رواية : نايف بن حمود السويط..

"فارس الجربا" شيخ شمر وضدّوه (العُبَيد) إللي بالحويقه . وكان الجربا
توّه حادر من نجد , وقبيلته إللي معاه ضعيفه . وبغى شيخة الجزيره ولا تمكن
عليه من قوة هذولا العُبَيد إللي أقوى منه..

وهو يوصي (شايوش بن سويط) شيخ الظفير هكالحين , وصى لشايوش على إن عندي
ديرةٍ طيبه . وأبيك تفزع لي على أهله.. ولِفا عليه شايوش بن سويط..

- قال الجربا لشايوش : والله عندنا العُبَيد , وأنت تشوف ضدونا , ولاعندنا قدرةٍ عليهم..

- قال شايوش : يالجربا نبي نتعاهد أنا وياك على الأخاوه . إنتناصفه بالنص أنا وياك , لي نص الجزيره , ولك نص؟

- قال الجربا : هذي الساعه المباركه .

تعاهدوا على هالراي هذا, ومشوا عليه وحاربوا العبيد وأضعفوهم . وجلُّوهم
من "الحويقه") لأن شمر والظفير قبيله كبيره . ويوم جا الحول ..

- قال الجربا : يا إبن سويط والله مايستوي شيخين بديرةٍ وحده !!

- قال شايوش : لا ياالجربا ! خاف الله !! نسيت المعاهده إللي بيني وبينك؟؟ أنت جبتني من ديرتي منَّاك على المعاهده هذي؟

- قال الجربا : والله ماعندنا من راسين بهالديره!

- قال شايوش : زين...إما لي وإما لك ..!!

وتكاونوا هو وياه بمنطقة ((جُرجُب)) ويكسرون الظفير شمر .

يسمونه شمر ((ليلة جرجب)) وليا مَنَّه تراوى واحد منهم قال : ((على ليلة جرجب)) .

ويقصد الشيخ مانع بن سويط هذي القصيده:

ياراكب من عندنا بنت عبّار

نسل فرحه بوقت طيحة حواره

تَلْفي لـ(فارس)ربعته كنها الغار

كم حايل عشى النشاما فقاره

الحرب أشاروا بها عمسين الأشوار

منــا ومنهم منتوينٍ دماره

يحسبون الحرب يرجع ليا صار

راح يتجازى بالنشاما مهاره

حنا سويطات على الحرب صبار

لمن الحريب لحربنا شب ناره

نزمي كما تزمي شخانيب "سنجار"

وإلا كيفان الدبا ياطا الزباره

وحنا هل الجمع مسبل ليا سار

حريبنا لازم يخلي المعـاره

وسيوفنا قد عَذَّبت كل جبار

وجدودنا سيــد القبايل خياره

وليا جيت "منوِّخ" يسرح الطار

قِل لُـه عن الحمرا يخلي يساره

قِل لُـه يــدور مع الشط معبار

ويسوق قرشه للمعيبر خساره

منقول من كتاب قبيلة الظفير .. للفائده

والسلام عليكم ورحمة الله وبركاته

» الشيخ مانع بن سويط يأخذ الابل التي بوجه امير شمر ابن رشيد
» الموانع الذين تم ذكرهم بالتاريخ (مانع ابن صويط )
» ابن سويط و بن عريعر ، يوم يتحاربون قبل حكم آل سعود
» تاريخ قتل الامير مانع بن صويط 1145هجري ودفن في غار بداح قرب حفر العتش
» من قصائد علي بن ضويحي بن سويط لبن قشعم