ابن سويط و بن عريعر ، يوم يتحاربون قبل حكم آل سعود

قصة من رواية شيخ الظفير محمد بن سعدون السويط باللهجه العامية من كتاب
قبيلة الظفير لـ بروس إنغام .

"هذي سالفة ابن سويط وهو و بن عريعر ، يوم يتحاربون قبل حكم آل سعود . كان
ابن عريعر يبي ابن سويط . وأرسل له مندوب خدعة لابن سويط . قال ابن عريعر
لمندوبه : رح لبن سويط ، وإليا سعلك تقول بياع ، أبيع أغراض .

عندما حول المندوب على ابن سويط .

ـ قاله ابن سويط : شنت ؟ منين ياولد ؟

ـ قال : والله بياع .

ـ منين جيت ؟

ـ قال : والله أنا جيت من هالحسا .

ـ قال ابن سويط : عينت ابن عريعر ؟

قـــال : والله عينت ابن عريعر ، هالسنة عليه دهر ، وحلاله مجرب ، وحالته
شينه : وسكت ابن سويط وثر منه انجضع بهكالشجرة . وعندما خذاله شوي ، جاهم
يمشي .

ـ قال : ياولد ناشدك بالله ، ما قال ابن عريعر ! ليا جيت ابن سويط قل له إن
حلال بن عريعر مدهر وضاربه جرب ، حتنه مايدري عنا ، ويعدي علينا مع اثرك .

ـ قال : إلا والله صحيح يا ابن سويط .

ـ قال ابن سويط ياالله للعرب . ياالله شيلوا . وهم يشيلون الظفير وهو يصوت
ابن سويط لراعي الفرس متعبه الفريد من العسكر من الظفير ، عنده فرس طيبة .

قال : أنت تقعد يالفريد بالمراح . وتشب النيران . حتى لياظهر عليك ابن
عريعر يقول العرب ماراحوا ولا جاهم علم نذر.

ويوم جا الليل ويمشي الفريد بهالمرح يشب النيران . يوم ظهر عليهم ابن عريعر
لا والله النيران شابة والناس بمحلهم.

وقبل تطلع الشمس وإلا مغيرة خيل ابن عريعر عليه جايين من الحسا . يوم ركب
الفريد الفرس ولكده ، ولهي مقطي ، ما تبول المقطي . الفريد فرسه أقطت إذا
صارت مقطي الفرس ما تغير أبداً .

يوم جوه قوم ابن عريعر : ها يا ولدا وشنت ؟

ـ قال : والله أنا أدور لي ناقةٍ رجعت خلوج على ولده.

ـ وين العرب ؟

ـ قال : والله مادري تقل جايهم نذر ، وتقل جايهم شي .

الزبدة شال ابن سويط وانحدر .

ـ قال ابن عريعر : اركبوه مع واحد من العبيد هضولا . خلوه بمهلوبته !

ما يدري عنه إنه فرس الفريد متعبة .

وركب الفريد مع الرديف هكالعبد ، وقضب رسن فرسه ، وإلا يوم خذا شوي ، لا
والله تلته الفرس بالرسن . تلت الرسن منه ووقفت وهي تبول على القطي . يوم
خلصت خذا الجلال وجدعه وركب عليه . ويقوم يهذب ويمر الشيخ ابن عريعر ، قال :
أنا أسلم عليك ، أنا الفريد وعلى متعبه . وهو يلكده ويغير .

قال : ابن عريعر : ياالله ياهل الخيل ، وهم يطردونه . وطرد من طلعة الشمس
لياماجا الظهر ، عجزوا يلحقونه .

خيل ابن عريعر : هذي اللي منصلخة يده ، وهذي اللي جادعةٍ راعيه وهذي متلخمة
ايدينه من الركض . وخربهم خراب .

ويوم جا الفريد لبن سويط ولهو نازل . قال : ياابن سويط ابشرك ابن عريعر ما
حالك حاله ! اليوم من طلعة الشمس ياما جا الظهر وهم يطردون بي . لكن سرح !
والله ما عاد يجيك ابن عريعر ، سرح : ابن عريعر يوم ما قضبوا الفريد ،
رجعت خيله وقال انكفنا وإنكف لبلاده .

قصة اخرى من كتاب قبيلة الظفير لـ بروس إنغام، رواية مطني بن مجوي
الخالدي .

نازلين أهلنا ـ بني خالد ـ والشيخ هكالحين نايف بن منديل ـ نازلين بفيضة
الداير ، الداير فيضة بالحجرة ، وجا ابن هذال معه اربعمية خيال ، عادي على
أهلنا يبي يبيتهم . وهو يطرح عبد من عبيدنا عند (( الصلبة )) بطرف العرب ،
قضبه وصار قضيب.

عاد عربنا حادرين مع الظفير ما هم عندنا ، بس حنا الحموله على ماقيل ، ما
يجي خمسطعش خيال بس .

سعل ابن هذال العبد ، كم عمانك ، ما علم ، عاد (( ابن هذال )) يدري علموه
الصلبه .

ـ قال (( ابن هذال )) للعبد : ما تخسى ! يقولون لي الصلبة ما غير خمسطعش
رجال .

قال العبد : ما تحتاج خمسطعش رجال ، والله إن كان عمامي على اللي أنا خابر ،
والله إنك تجنب ما تشوفهم !

ـ و (( ابن هذال )) هو يأخذ المشعاب ويضرب العبد إليا غادي المشعاب على راس
العبد قطع .

ويوم جا العيد ، عيد الضحية ، وهو يصبحهم (( ابن هذال )) ويوم صبحهم . وهو
الله يعينهم ويركبون الخيل عليهم ( بني خالد ) ويجي كون ما يحضره الصديق .
يجنبون الزماميل ويردونه ويسردون (( ابن هذال سردة ما جرت ، وإليا مير بعض
عربنا مع الظفير حادرين . جاهم الخبر ، قالوا : (( ابن هذال )) اغار على ((
ابن منديل )) وخذه . وإليا مير واحد منهم يوم قام ، الله يجيرك ، ويحير
ويمير ، وهو شاعر يقال له : دغيم السربل .

دغيم يوم أخذ ليا العلم يجيه . قالوا : أبشرك عمامك سردوا (( ابن هذال ))
وسالمين . هذا (( ابن هذال )) يوم يغير على أهلنا . ابن شعلان مغير عليهم
مثل العام وساردينه بعد . أهلنا عند البل قبل لهم حظ . عند البل بخته .

قصد دغيم السربل يقول :

يا ونتي ونة فجيع الهوايـل

وإلا صويب كايد الـكسر
بالحيـل

ابطيت ما جاني مردود الرسايل

علوم تجمع لي على غير
تحصيـل

ياراكب من فوق ست جلايـل

كـبار المحـاصل كـنس
حيـل

عليهن من يوصل كلام دلايل

وصل مناخ الجيش بيت ابن
منديل

ياوايلي ما جاك علوم القبايل

فعـل يقـود الوجه قوله إليا
قيل

هذي عليكم من كبار الفشايل

جموع كسرتكم خمسة رجاجيـل

عمورات لا ركبوا سروج الاصايل

حريبهم يشكي المضره من الميل

من ضرب خيال يسوي هوايل

ليا ريع جلها للمقـاهير
بالحيـل

ومنهم لبن شعلان ينهج مسايل

يعلمه باللي جرى بالتفاصيـل

والبل صباحه مع المخاليق طايل

تلقى الذبايح من وراه
المشاكيـل

» عزاء الساده ال سويط // ال سلمان //
» قصة و قــــــصـــــــــيـــــده آل سويط شيوخ قبيلة الظفير المشهورين
» من قصائد علي بن ضويحي بن سويط لبن قشعم
» ابوذيات الاديب الشاعر ابو سكندربن سويط
» ليلـــة جرجب.. وماذا قال مانع بن سويط